દિવના દરિયામાં સર્જાયેલા ડિપ ડિપ્રેશનના પગલે સૌરાષ્ટ્રમાં મેઘ તાંડવની સ્થિતિ સર્જાઈ અને રાજ્યમાં મંગળવાર રાત્રે વિધિવત ચોમાસુ શરૂ થઇ ગયું હોય તેમ સમગ્ર સૌરાષ્ટ્ર, દક્ષિણ અને મધ્ય ગુજરાતમાં સાર્વત્રિક વરસાદ શરૂ થયો હતો. જેમાં બગસરામાં આભ ફાટ્યું હોય તેમ માત્ર છ કલાકમાં ૨૭ ઇંચ વરસાદ પડતા સમગ્ર પંથકમાં જળબંબાકાર સર્જાયો હતો. આ ઉપરાંત ધારીમાં ૨૨, ગીરમાં ૧૭ અને ઊનામાં ૧૫ ઇંચ વરસાદ પડતા અનેક નદીઓ બે કાંઠે વહેવા લાગી હતી. ભાદર ડેમ ઓવરફલો થતાં ૨૯ દરવાજા ખોલી દેવાયા હતા. જ્યારે લીલાખા બેટમાં ફેરવાઇ ગયું હતું.અમરેલી પંથકમાં મેઘતાંડવથી ર૩ના મોત થયાના અહેવાલ સાપડી રહ્યા છે. જ્યારે બગસરાના વાઘડીયામાં ૧૩ના મોત થયાનું બિનસત્તાવાર રીતે જાણવા મળ્યું છે. બગસરાથી પીથડીયા જતી બસ ખાબકતાં પાંચના મોત થયા હતાં. આમ કુલ મૃત્યુઆંક ૩૮ હોવાનું બિનસત્તાર રીતે જાણવા મળે છે.ભારે વરસાદથી અમરેલીના ૧૨ ગામો સંપર્ક વિહોણા થતા ફસાયેલા લોકોને બહાર કાઢવા બે હેલિકોપ્ટર મોકલાયા હતા. જ્યારે ગોંડલ તાલુકામાં બે ગામને જોડતો પુલ તૂટી પડતાં બે ગામ સુલતાનપુર અને રાણસીકી સંપર્ક વિહોણા થઇ ગયા હતા. વરસાદથી અનેક સ્થળે વીજપુરવઠો ખોરવાઇ ગયો હતો. જ્યારે ૬૦૦ જેટલા લોકો વરસાદી પાણીમાં ફસાઇ ગયા હતા.સૌરાષ્ટ્રના તમામ ૧૦ જિલ્લામાં સાર્વત્રિક નોંધપાત્ર વરસાદ થયો હતો. જેમાં ઊના તાલુકામાં ૧૫ ઇંચ, સૌરાષ્ટ્રના ચાર તાલુકામાં ૮ થી ૧૧ ઇંચ તેમજ દસ તાલુકામાં ૪ ઇંચથી વધ વરસાદ નોંધાયો હતો. સૌરાષ્ટ્રના ૮ તાલુકામાં ૩ ઇંચ, ૨૧ તાલુકામાં બે તથા ૫૨ જેટલા તાલુકામાં એક ઇંચથી વધુ વરસાદ થયો છે. આ લખાય છે ત્યારે પણ ધીમી ધારે વરસાદ ચાલુ રહ્યો છે.રાજકોટ સહિત સમગ્ર સૌરાષ્ટ્રમાં મંગળવાર રાતથી સર્વત્ર જોરદાર વરસાદ પડતાં સૌરાષ્ટ્રમાં પડેલા પ્રથમ વરસાદે જ પાણી જ પાણી કરી દીધંુ છે. બગસરામાં ૬ કલાકમાં ૨૭ ઇંચ, ધારીમાં પણ ૨૨ ઇંચ વરસાદ ખાબકી ગયો હતો. રાજુલામાં ૧૦ ઇંચ, ગીરમાં ૧૭ ઇંચ, ઊનામાં ૧૫ ઇંચ, માળિયા હાટીનામાં ૧૨ ઇંચ વરસાદ ખાબક્યો છે. જ્યારે તાલાલા અને કોડીનારમાં ૯ ઇંચ, ખાંભા ૫ ઇંચ, માંગરોળ ૫ ઇંચ અને કેશોદ ૫ ઇંચ વરસાદ પડ્યો છે. સૌરાષ્ટ્રમાં સૌથી વધારે વરસાદ ઊના, તાલાલા અને માળિયા હાટીનામાં પડ્યો છે. વરસાદથી નદીઓમાં પાણી વહેતા થયા છે. અમરેલીની રાયડી અને ઠેબી નદીમાં ઘોડાપૂર આવ્યા છે. ખોડિયાર ડેમ ઓવરફલો થતાં તેનું પાણી અમરેલી પંથકના વિસ્તારમાં ફરી વળ્યું છે.શહેરભરના રાજમાર્ગો પર જાણે નદીઓ દોડતી થઇ ગઇ તેવા દ્રશ્યો સર્જાયા હતા. બીજી બાજુ વીજળીના કડાકા-ભડાકા વચ્ચે અનેક વિસ્તારોમાં વીજળી પણ ગૂલ થઇ ગઇ હતી. લાંબા સમય બાદ મેઘરાજા મનમૂકીને ગીર, ઊના, તાલાલા, કોડીનાર અને માંગરોળ પર વરસ્યા હતા. તોફાની પવનના કારણે અનેક સ્થળે ઝાડ પણ ધરાશાયી થયા હોવાનું જાણવા મળે છે. અનેક ગામડાઓમાં ભારે વરસાદના કારણે અંધારપટ સર્જાયો હતો. જ્યારે ટેલીફોન અને મોબાઈલ સેવાઓ પણ ખોરવાઈ જવા પામી હતી.આ ઉપરાંત ઠેર-ઠેર પાણી ભરાઈ જતાં બસ અને રેલ વ્યવહારને પણ અસર થઈ હતી. ભારે વરસાદથી દક્ષિણ ગુજરાતના પણ અનેક વિસ્તારોમાં જનજીવન ખોરવાઈ ગયું હતું. ભારે વરસાદના પગલે શાળા-કોલેજો બંધ રાખવાનો સત્તાવાળાઓએ આદેશ કર્યા હતા. જ્યારે ભાવનગર યુનિવર્સિટી તથા દક્ષિણ ગુજરાત યુનિવર્સિટી પરીક્ષાઓ મોકુફ રાખવાની જાહેરાત કરી હતી. રાજ્યમંત્રી મંડળની આજે મળેલી બેઠકમાં ભારે વરસાદ તથા આગામી ૩૬ કલાકમાં વધુ ભારેથી અતિભારે વરસાદની આગાહી હોવાથી સ્થિતિની સમીક્ષા કરવામાં આવી હતી તથા તંત્રને સાબદુ કરી અધિકારીઓની રજાઓ રદ કરવામાં આવી હતી. આ ઉપરાંત તમામ મંત્રીઓને તેમના મત વિસ્તારમાં જ રહેવાની તાકીદ કરવામાં આવી હતી.
ગઈરાતથી શરૂ થયેલા ભારે વરસાદના કારણે સૌરાષ્ટ્રના મોટાભાગના ડેમ છલકાઈ ગયા હતા. રાજકોટ મ્યુનિસિપલ કોર્પોરેશને હાઈએલર્ટ જાહેર કરી નાગરીકોને આગામી ૨૪ કલાક સુધી તેમના ઘરમાં રહેવા જ અપીલ કરી હતી. સૌરાષ્ટ્ર અને દક્ષિણ ગુજરાતમાં તોફાની પવનના કારણે તુટી પડેલા ભારેથી અતિભારે વરસાદના લીધે સેંકડો વૃક્ષો, હોર્ડિંગ્સ વગેરે ધરાશાયી થયા હતા. કરોડોની માલ-મિલકતને નુકશાન થયું હતું. ગોંડલમાં ભારે વરસાદથી બે વ્યક્તિઓના મોત થયા હોવાના અહેવાલો પ્રાપ્ત થયા છે. જ્યારે પાણીના ધસમસતા પ્રવાહના કારણે સુલ્તાનપુરનો બ્રીજ ભયજનક સ્થિતિમાં મુકાતા સ્થળ પર પહોંચેલા ગોંડલના મામલતદાર અને અન્ય અધિકારી પણ પાણીમાં ફસાતા તેમને બચાવવા જામનગર એરબેઈઝથી ભારતીય વાયુદળના હેલિકોપ્ટરને રવાના કરવામાં આવ્યા હતા. જેમણે આ બન્ને અધિકારીઓને હેમખેમ બચાવી લીધા હતા. એસ ટી બસના મુસાફરો અટવાયા
અમરેલીના કુકાવાવ પાસે ભારે વરસાદથી પાણીમાં એસટી બસ ફસાઇ હતી. જેમાં મુસાફરો મુશ્કેલીમાં મૂકાયા હતા. તે દરમિયાન એસટીના ડાયરેક્ટરે આ ઘટનાને સમર્થન આપ્યું હતું. ફસાયેલી એસટી બસને તંત્ર દ્વારા બચાવ કામગીરી શરૂ કરી દેવામાં આવી હતી. કુકાવાવની આજુબાજુના વિસ્તારોમાં વરસાદના પાણી ઘરમાં ઘૂસી જતા ૬૦૦થી વધુ લોકો ફસાયા હતા.ટ્રેનને દેલવાડા અટકાવાઇ
સૌરાષ્ટ્રમાં પડેલા ભારે વરસાદથી તમામ માર્ગો બંધ થઇ જતા લોકોની અવર-જવર બંધ થઇ છે. તાલાલા અને ઊના વચ્ચેના રેલવે ટ્રેકનું ધોવાણ થતાં દેલવાડાથી જૂનાગઢ જતી ટ્રેનને દેલવાડા જ અટકાવી દેવાઇ છે. જ્યારે બીજી જગ્યાએ પણ ટ્રેન રોકવામાં આવી હતી. ગીરગઢડા અને વડવિયાળા વચ્ચે રેલવે ટ્રેકનું ધોવાણ થતાં ટ્રેકની નીચેથી પાણી વહી રહ્યા છે.અમરેલીના ૧૨ ગામો સંપર્ક વિહોણાઃ હેલિકોપ્ટરની મદદ લેવાઇ
સૌરાષ્ટ્રના તમામ ધારાસભ્યોને પોતાના મત વિસ્તારમાં પહોંચી પૂરની પરિસ્થિતિ અને રાહત બચાવની કામગીરીની સમીક્ષા કરી અહેવાલ રજૂ કરવા માટે મુખ્યમંત્રી કચેરી દ્વારા આદેશ થયા છે. તેમજ કાલે યોજાનારી ચિંતન શિબિરમાં પૂર અસરગ્રસ્ત વિસ્તારોના અધિકારીઓને મુક્તિ આપવામાં આવી છે. એટલું જ નહીં, અમરેલીમાં ભારે પૂરને પગલે અમદાવાદની ફાયરબ્રિગેડની ટીમ રેસ્ક્યુ માટે રવાના થઇ ગઇ છે. રાજ્યના સૌરાષ્ટ્ર અને દક્ષિણ ગુજરાતમાં છેલ્લા ૨૪ કલાકમાં થયેલા અતિ ભારે વરસાદને કારણે અમરેલી જિલ્લાના ૧૨ ગામો સંપર્ક વિહોણા થઇ ગયા છે. ભારે વરસાદને કારણે નદી-નાળાઓમાં ભારે પૂરની પરિસ્થિતિ ઊભી થઇ છે. લોકોને નીચાણવાળા સ્થળે નહીં જવા સૂચના આપવામાં આવી છે. કલેક્ટર એચ.આર. સુથાર, ડીડીઓ સુજિતકુમાર સહિત જિલ્લાની ડિઝાસ્ટર ટીમ દ્વારા રાહત બચાવની કામગીરી થઇ રહી છે.જે ગામોમાં પાણી ભરાયા છે અને લોકો ફસાયા છે, ત્યાં હેલિકોપ્ટરની મદદ લેવા કલેક્ટર દ્વારા કાર્યવાહી હાથ ધરવામાં આવી છે. તમામ અધિકારીઓ અને કર્મચારીઓની રજાઓ રદ કરી દેવામાં આવી છે. એસઆરપીની ચાર ટૂકડી પણ રાહત કામગીરીમાં લાગી ગઇ છે.ભાદર ઓવર ફલો, લીલાખા બેટમાં ફેરવાયું
રાજકોટની જીવાદોરી સમાન ભાદર ડેમની સપાટી ૩૨ ફૂટને આંબી ગઇ છે. કુલ ૩૪ ફૂટ પહોંચતા ડેમ ઓવર ફલો થઇ ગયો છે. તંત્રના જણાવ્યા પ્રમાણે ભાદર ડેમના તમામે તમામ ૨૯ દરવાજા છ ફૂટ સુધી ખોલી દેવાયા છે. ડેમ હેઠળના ગામોમાં પાણી ઘૂસી ગયા છે. ગોંડલનું લીલાખા ગામ બેટમાં ફેરવાયું છે. ગોંડલના સુલતાનપુર ગામે રેસ્ક્યુ ઓપરશન માટે ટીમ સાથે ગયેલા ગોંડલના મામલતદાર આર. આર. બોળાદ અને નાયબ મામલતદાર મનિશ જોશી ફસાયા હોવાના સમાચાર મળી રહ્યા છે. હાલ તેમના રેસ્ક્યુ ઓપરેશન માટે જામનગરથી હેલિકોપ્ટર રવાના કરી દેવાયું છે. ગોંડલના દેવાળા ગામ પાસેથી પસાર થતા વોંકળામાં બે બાળકો ડૂબ્યા હોવાના અહેવાલ છે.ભાદર ડેમમાં છેલ્લા ૨૪ કલાકમાં ભારે વરસાદ પડતા ૮ ફૂટના નવા નીરની આવક થઇ છે. ચોમાસાના પ્રારંભે જ ભાદર ઓવરફલો થતાં તંત્રને પ્રજા માટે પાણીની ચિંતા હળવી બની છે. ભાદર ડેમના તમામ દરવાજા ખોલાતા નીચાણવાળા વિસ્તારોમાં પાણી ભરાવાથી તંત્રએ લોકોને ચેતવણી આપી દીધી છે.ગોંડલના અનેક ગામોમાં વીજળી અને મોબાઇલ સેવા ઠપ
ગોંડલના ગોકુલેશ ગૌશાળામાં પાંચ ફૂટ સુધી પાણી ભરાતા ૨૦ પશુ તણાયા હોવાના સમાચાર છે. તેમજ ગોંડલના ઘોઘાવદર ગામમાં ૧૨ ઇંચ વરસાદથી ઘરોમાં પાણી ઘૂસ્યા છે. ગોંડલના દેરડી, મેતા ખંભાળિયા, રાણસિકી સહિત અનેક ગામોમાં પાણી ભરાયા છે. ગોંડલની ગોેંડલી નદી બે કાંઠે વહી રહી હોવાના અહેવાલ છે. ગોેંડલ શહેરના નીચાણવાળા વિસ્તારોમાં ઘરમાં ૫ ફૂટ પાણી ભરાતા લોકો હેરાન પરેશાન બની ગયા છે. તેમજ અનેક ગામોમાં વીજળી અને મોબાઇલ સેવા ઠપ થઇ ગઇ છે.પુલ તૂટી પડતાં બે ગામો સંપર્ક વિહોણા
ગોંડલ તાલુકાના સુલતાનપુર અને રાણસિકી ગામને જોડતો ૧૨ મીટર પુલ પાણીના ભારે દબાણથી ધરાશાયી થતા બંને ગામો સંપર્ક વિહોણા બન્યા છે. તેમજ ગોંડલ પંથકમાં વીંઝીવાડ ગામમાં પાણી ઘૂસી જતા અનેક પરિવારો છત પર આશરો બનાવ્યો છે. તેમજ મોટા સખપર, નાના સખપર સહિત ૧૦ ગામો સંપર્ક વિહોણા બન્યા છે.રાજ્યમાં અતિ ભારે વરસાદની આગાહી
મંગળવારે વહેલી સવારે અરબી સમુદ્રનાં ઉત્તર-પૂર્વ વિસ્તારમાં સર્જાયેલું ડીપ ડિપ્રેશન આગળ વધીને દક્ષિણ ગુજરાતનાં દરિયાકાંઠાની નજીક પહોંચ્યું છે. જેને કારણે આગામી ૨૪ કલાકમાં રાજ્યનાં દક્ષિણ ગુજરાત, સૌરાષ્ટ્ર અને દરિયાકાંઠાના વિસ્તારોમાં ભારેથી અતિ ભારે વરસાદની શક્યતા છે. જ્યારે રાજ્યનાં ઉત્તર અને મધ્ય ગુજરાતમાં વરસાદના છૂટાછવાયા ઝાપટાથી લઇને હળવા વરસાદની શક્યતા હવામાન વિભાગે વ્યક્ત કરી છે. ત્યાર બાદ બે દિવસો દરમિયાન દક્ષિણ ગુજરાત, સૌરાષ્ટ્ર, દીવ-દમણ અને દાદરા નગર હવેલીમાં કેટલાક સ્થળોએ ધોધમાર વરસાદ પડવાની શક્યતા છે.ડેમ છલકાયા- રાજકોટનો ભાદર ડેમ ઓવરફ્લો- ન્યારી-૧માં સાડા આઠ ફુટ પાણી- આજી-૧માં સાડા છ ફુટ પાણી- ભાવનગર જિલ્લાના પાંચ ડેમ ઓવરફ્લો- ત્રણ ડેમમાં ૭૦ ટકાથી વધુ પાણીની આવક- બોરતળાવમાં ૩૫ ફુટ પાણી- ખોડીયાર તળાવમાં ૧૫ ફુટ પાણી- શેત્રુંજી ડેમમાં ૧૮.૬ ફુટ પાણી- ધારીનો ખોડીયાર ડેમ ઓવરફ્લો- ભાદર ડેમ ઓવરફ્લો થતા ૨૯ દરવાજા ખોલાયાવધારે અસરગ્રસ્ત ગામો
ખારીખીજડીયા, કમીગઢ, કેરાળા, ઢોલરવા, બાબાપુર, મોટીકુંકાવાવ, વડીયા કૃષ્ણપરા વિસ્તાર, ચારણપીપળી, હડાળા, જામકા, બગસરા માર્કેટિંગ યાર્ડ પાસે, પીઠળીયા પરબડીક્યાં કેટલો વરસાદ
સૌરાષ્ટ્રજગ્યા વરસાદ (ઇંચમાં)
બગસરા ૩૦
ધારી ૨૨
ગિર ૧૭
ઉના ૧૫
રાજકોટ ૧૪
જેતપુર ૫
માળીયાહાટીના ૧૨
તલાળા ૯
કોડીનાર ૯
ખાંભા ૫
કેશોદ ૫
જગ્યા વરસાદ (ઇંચમાં)
પોરબંદર ૪
વંથલી ૪
ભાવનગર ૪
ભાવનગર છ ઇંચથી વધુ
પાલીતાણા નવ ઇંચથી વધુ
ઉમરાલા છ ઇંચથી વધુ
જેસલ સાત ઇંચથી વધુ
સિહોર ચાર ઇંચથી વધુ
વલ્લભીપુર છ ઇંચથી વધુ
માંગરોળ ૪
દક્ષિણ ગુજરાત
સુરત૭
No comments:
Post a Comment