તક મળે તો પાકિસ્તાની ફિલ્મ પણ કરીશ

ટોચની અભિનેત્રી પ્રિયંકા ચોપરા કહે છે

-કોની સાથે કામ કરવા ઉત્સુક છે એ ગુપ્ત રાખ્યું

ટોચની અભિનેત્રી પ્રિયંકા ચોપરાએ કહ્યું હતું કે મને તક મળશે તો ભવિષ્યમાં હું પાકિસ્તાની ફિલ્મ કરીશ. એ ફિલ્મ કરવાનું મને ગમશે.
મેરી કોમ જેવી ફિલ્મ કરીને નેશનલ એવોર્ડ મેળવી
ગયેલી અને હાલ બાજીરાવ મસ્તાની જેવી હિટ ફિલ્મમાં બાજીરાવની પહેલી પત્ની કાશીબાઇનો રોલ કરી ચૂકેલી પ્રિયંકા હાલ અમેરિકી ટીવી સિરિયલ ક્વોન્ટિકો કરી રહી છે. તમને કયા પાકિસ્તાની અભિનેતા સાથે કામ કરવાનંુ ગમશે એવા સવાલના જવાબમાં એણે રમૂજમાં કહ્યું હતું કે તુમ મુઝે લડવાના ચાહતે હો ક્યા ? પછી તરત એણે ઉમેર્યું હતું કે મારી ફિલ્મો હીરો પર ચાલતી નથી. મારા અભિનય પર ચાલે છે. 'અલબત્ત, આમ કહીને હું કોઇ અભિનેતાને ઊતારી પાડવા માગતી નથી પરંતુ હું માત્ર મારા પાત્રને વફાદારીપૂર્વક રજૂ કરું છું. હીરો કોણ છે એ મારો સવાલ નથી. હું માત્ર આનંદ ખાતર ફિલ્મો કરું છું. હું એક એન્ટરટેઇનર (મનોરંજન પીરસતી કલાકાર) છું.'
હાલ એ પાકિસ્તાની અભિનેતા ફવાદ ખાન સાથે રીમા કાગતીની ફિલ્મ મિસ્ટર ચાલુ કરી રહી છે. તમે કેેવી પાકિસ્તાની ફિલ્મ કરવાનું પસંદ કરશો એવા સવાલના જવાબમાં એણે કહ્યું કે કેવી સ્ક્રીપ્ટ મારી સામે આવે છે અને એમાં મારો રોલ કેવો છે એના પર ઘણો આધાર રહે છે.