આજે એક 'લીપ' સેકન્ડ ઉમેરાતાં દિવસ એક સેકન્ડ લાંબો થશે

૧૯૭૨માં શરૃ થયેલી પરંપરા

સમયનો તાલ મેળવવા 'લીપ' સેકન્ડ ઉમેરાય છે

પૃથ્વીનું ધરિભ્રમણ ક્રમશઃ ધીમું પડી રહ્યું છે તેની સાથે સમયનો તાલ મેળવવા 'લીપ' સેકન્ડ ઉમેરાય છે
પૃથ્વીના ધરિભ્રમણની ગતિ ક્રમશઃ મંદ પડતી હોવાથી સમયનો તાલ મેળવવા ૩૦મી જૂને દિવસમાં એક સેકંડનો ઉમેરો કરવામાં આવે છે. આજે આ 'લીપ' સેકન્ડ ઉમેરાતાં આજનો દિવસ એક સેકન્ડ લાંબો થશે. સામાન્ય રીતે દિવસ ૮૬૪૦૦ સેકન્ડનો હોય છે. 'લીપ' સેકન્ડની ગણતરી એટમિક ટાઇમના આધારે થાય છે. એટમિક ટાઇમ સેસિયમના અણુમાંથતાં ઈલેક્ટ્રોમેગ્નેટીક તરંગોના આધારે ગણાય છે.
સૂર્ય, ચંદ્ર અને પૃથ્વીના ગુરુત્વાકર્ષણના ટકરાવને કારણે પૃથ્વીનું ધરિભ્રમણ ધીમું પડી રહ્યું છે. વિજ્ઞાાનીઓના અંદાજ મુજબ ૧૮૨૦ પછીના વર્ષો ૮૬૪૦૦ સેકન્ડના રહ્યા નથી. બે મિલિસેકન્ડ કે આંખના પલકારા જેટલો સમય કોઇના ધ્યાનમાં આવે નહીં પરંતુ લાંબા ગાળે એક સેકન્ડ જેટલો ફેર પડે. પૃથ્વીના ધરિભ્રમણની ઝડપ ઘટી રહી છે. તેના સમયનો અંદાજ મુશ્કેલ છે. દિવસની લંબાઇ ઉપર પણ પરિબળો અસર કરતાં હોય છે. એટલે લીપ સેકંડ ઉમેરાય છે.
સામાન્ય રીતે જૂનની ૩૦ કે ડિસેમ્બરની ૩૧ તારીખે લીપ સેકન્ડ ઉમેરાય છે. સામાન્ય રીતે ઘડિયાળમાં ૨૩ઃ૫૯ઃ૫૯ પછી ૦૦ઃ૦૦ઃ૦૦ આવે છે અને નવો દિવસ શરૃ થાય છે. આજે તેમાં એક સેકન્ડ ઉમેરાયા પછી જુલાઇની ૧લી તારીખ થશે. અગાઉ લીપ સેકન્ડની ગણતરી કરવી પડકારજનક કાર્ય હતું. ૧૯૭૨માં લીપ સેકન્ડ ઉમેરવાની પ્રથા શરૃ થયેલી. ૧૯૯૯ સુધી દર વર્ષે એક એક લીપ સેકન્ડ ઉમેરાઇ હતી. ત્યાર બાદ તે નિયમિત ઉમેરાતી નહોતી. ૨૦૦૦ના વર્ષ પછી આજે માત્ર ચોથી વાર 'લીપ' સેકન્ડ ઉમેરાઇ રહી છે.