કોલંબિયાને પેનલ્ટી શૂટઆઉટમાં હરાવીને આર્જેન્ટીના સેમિ ફાઇનલમાં

આર્જેન્ટીનાનો ૫-૪થી રોમાંચક વિજય

સડન ડેથમાં કાર્લોસ તેવેઝે નિર્ણાયક પેનલ્ટીને ગોલમાં ફેરવી

આર્જેન્ટીનાએ હાઇવોલ્ટેજ ક્વાર્ટર ફાઇનલમાં કોલંબિયાને પેનલ્ટી શૂટઆઉટમાં ૫-૪થી હરાવીને કોપા અમેરિકા ૨૦૧૫ની સેમિ ફાઇનલમાં પ્રવેશ મેળવી લીધો છે. મેસી, તેવેઝ, માસ્કેરાન્હો, ડી મારિયા જેવા સુપરસ્ટાર્સ ધરાવતી આર્જેન્ટીનાની ટીમને કોલંબિયાના મજબુત ડિફેન્સે અટકાવી રાખી હતી. બંને ટીમોના હાઇક્વોલિટી ફૂટબોલ છતાં નિર્ધારિત સમય બાદ સ્કોર ૦-૦થી બરોબરી પર રહ્યો હતો. આખરે પેનલ્ટી શૂટઆઉટમાં આર્જેન્ટીનાએ ૫-૪થી દિલધડક વિજય મેળવ્યો હતો.
પેનલ્ટી શૂટઆઉટમાં પણ ભારે રોમાંચક તબક્કે પહોંચેલા મુકાબલામાં કોલંબિયાના જેસન મુરીલોએ ફટકારેલી પેનલ્ટી કીક પર બોલ ગોલ પોસ્ટની ઉપર થઇને જતો રહ્યો હતો. જ્યારે આ પછીનો બધો મદાર કાર્લોસ તેવેઝની પેનલ્ટી કીક પર હતો, તેવેઝ તનાવ વચ્ચે ગોલ ફટકારતાં આર્જેન્ટીનાને સેમિ ફાઇનલમાં પ્રવેશ અપાવ્યો હતો.આર્જેન્ટીના તરફથી ગોલકિપર રોમેરોએ શાનદાર દેખાવ કરતાં ટીમની જીતમાં પાયાની ભૂમિકા ભજવી હતી.
હવે આર્જેન્ટીનાની ટીમ બ્રાઝિલ અને પેરાગ્વે વચ્ચે રમાનારી બીજી સેમિ ફાઇનલમાં જીતનારી ટીમની સામે રમશે. આ મુકાબલો ૧લી જુલાઇે પરોઢે ૫.૦૦ વાગ્યાથી રમાશે. જો કે કોલંબિયાનો પરાજય ગોલકિપર ડેવિડ ઓસ્પીના માટે અત્યંત નિરાશાજનક રહ્યો હતો. જેણે આર્જેન્ટીનાના વર્લ્ડ ક્લાસ સ્ટ્રાઇકર્સ સામે એકલા હાથે લડત આપતાં સ્કોરશીટને ક્લિન રાખી હતી, પણ પેનલ્ટી શૂટઆઉટમાં તે ખાસ કમાલ દેખાડી શક્યો નહતો.
પેનલ્ટી શૂટઆઉટમાં આર્જેન્ટીનાના લુકાસ બીગ્લીયા અને માર્કોસ રોજોએ ગોલ ફટકારવાની તક ગુમાવી દીધી હતી. કોલંબિયાના સ્ટાર ખેલાડી જેમ્સ રોડ્રીગ્યુઝે પણ અસરકારક દેખાવ કરતાં આર્જેન્ટીનાના ડિફેન્ડરોને પરેશાન કર્યા હતા. જો કે મેક્સિકન રેફરીએ આર્જેન્ટીનાના ખેલાડીઓ તરફ સોફ્ટ વલણ દાખવ્યું હોવાનું જોઇ શકાતું હતુ.

પેનલ્ટી શૂટઆઉટ

મેક્સિકો(સ્કોર)	આર્જેન્ટીના(સ્કોર)	કુલ સ્કોર
રોડ્રીગ્યુઝ (૧)	મેસી (૧)	૧-૧
ફાલ્કાઓ (૧)	ગેરાય (૧)	૨-૨
ક્યુએડ્રાડો(૧)	બાનેગા (૧)	૩-૩
મુરીઇલ(૦)	લાવેઝી (૧)	૩-૪
કાર્ડોના (૧)	બિલ્ગીયા (૦)	૪-૪
ઝુનીગા (૦)	રોજો (૦)	૪-૪
મુરીલો (૦)	તેવેઝ(૧)	૪-૫