વિમ્બલ્ડનના ડ્રો જાહેર ઃ યોકોવિચ અને ફેડરરની રાહ મુશ્કેલ

ફેડરર, નડાલ અને મરે એક જ હાફમાં મુકાયા

સોમવારથી શરુ થઇ રહેલી વિમ્બલ્ડન ગ્રાન્ડ સ્લેમ ચેમ્પિયનશીપમાં યોકોવિચ અને ફેડરરને મુશ્કેલ ડ્રો મળ્યા છે. ગ્રાસ કોર્ટ પર રમાતી ગ્રાન્ડ સ્લેમ ચેમ્પિયનશીપમાં યોકોવિચને તેની પ્રથમ મેચમાં જ જર્મનીના કોલ્ચેઇબેરનો સામનો કરવો પડશે. જ્યારે બીજા રાઉન્ડમાં યોકોવિચનો સામનો ઓસ્ટ્રેલિયાના સિનિયર ખેલાડી હ્યુઇટ્ટની સામે થઇ શકે છે.
સ્વિસ લેજન્ડ ફેડરરની રાહ પણ મુશ્કેલ છે. ફેડરરના હાફમાં સ્પેનિશ સ્ટાર નડાલને તેમજ બ્રિટીશ ટેનિસ ખેલાડી એન્ડી મરેને સ્થાન આપવામાં આવ્યું છે, જેના કારણે આ ત્રણ ખેલાડીમાંથી સંભવતઃ કોઇ એક જ ફાઇનલ સુધી પહોંચી શકશે. ફેડરરે તેની પ્રથમ મેચમાં બોસ્નીયાના ડ્ઝુમહુર સામે રમવાનું આવશે. જ્યારે બ્રિટનના એન્ડી મરેને કઝાકિસ્તાનનો અપસેટ સર્જી શકે તેવો કુકુશ્કીન જેવો ખેલાડી પહેલા રાઉન્ડમાં મળ્યો છે.
બે વખતનો ભૂતપૂર્વ ચેમ્પિયન નડાલ ૧૦મો સીડ ધરાવે છે અને તેને બ્રાઝિલના બેલૂચી સામે પ્રથમ રાઉન્ડમાં રમવાનું આવ્યું છે. નડાલની ક્વાર્ટર ફાઇનલ સુધીની રાહમાં સોંગા તેમજ ફેરર જેવા ખેલાડીઓ આવી શકે છે. વિમેન્સ સિંગલ્સમાં સેરેના વિલિયમ્સના હાફમાં જ શારાપોવાને સ્થાન મળ્યું છે, જેના કારણે જો અપેસટ નહીં થાય તો બે દિગ્ગજ ખેલાડીઓ સેમિ ફાઇનલમાં આમને-સામને રમી શકે છે.