કોપા અમેરિકા ઃ પેરુ સામેની જીત સાથે ચિલી ફાઇનલમાં

ફાઇનલમાં આર્જેન્ટીના કે પેરાગ્વે સામે મુકાબલો

એડયુર્ડો વર્ગાસના બે ગોલ નિર્ણાયક બન્યા ઃ ચિલીમાં લોકોએ સડકો પર ઉતરીને ઉજવણી કરી

યજમાન ચિલીએ ૨-૧થી પેરુ સામેની ક્વાર્ટર ફાઇનલ જીતવાની સાથે કોપા અમેરિકા ફૂટબોલ ચેમ્પિયનશીપની ફાઇનલમાં પ્રવેશ મેળવી લીધો છે. પેરુ સામેની હાઈવોલ્ટેજ મેચમાં જબરજસ્ત હોમ સપોર્ટની સાથે રમવા ઉતરેલા ચિલી તરફથી એડયુર્ડો વર્ગાસે વિજયી દેખાવ કરતાં બે ગોલ ફટકાર્યા હતા, જેના સહારે જ ચિલી ફાઇનલમાં પ્રવેશવામાં સફળ રહ્યું હતુ.
ચિલીની જીતને સ્થાનિક ચાહકો ભારે જોશ અને ઉત્સાહ સાથે ઉજવી હતી. ચિલીના ફૂટબોલ સમર્થકો રાષ્ટ્રધ્વજ લઇને સડકો પર ઉતરી આવ્યા હતા.
હોટલો અને રેસ્તોરામાં મોડી રાત સુધી પાર્ટી ચાલતી જોવા મળતી હતી. સમર્થકો હવે આતુરતાપૂર્વક ૪ જુલાઇએ રમાનારી ફાઇનલનો ઈંતેજાર કરી રહ્યા છે, જેમાં ચિલીની સામે આર્જેન્ટીના કે પેરાગ્વેમાંથી એક ટીમ હશે. આ બંને ટીમો વચ્ચેની બીજી સેમિફાઇનલ આવતીકાલે વહેલી પરોઢે રમાવાની છે.
સેમિ ફાઇનલમાં ત્રણેય ગોલ પ્રથમ હાફમાં જ નોંધાયા હતા. વર્ગાસના પહેલા ગોલ બાદ પેરુએ ભારે આત્મવિશ્વાસ સાથે પુનરાગમન કર્યું હતુ અને તેઓ કાર્લોસ ઝામ્બ્રાનોના ગોલને સહારે બરોબરી મેળવી લીધી હતી. જો કે વર્ગાસ થોડી વાર પછી ફરી ત્રાટક્યો હતો અને ચિલીએ સરસાઇ મેળવી લીધી હતી.
બીજા હાફમાં પેરુના ખેલાડીઓએ મેચમાં પાછા ફરવાનો જોરદાર પ્રયાસ કર્યો હતો, પણ તેઓ ચિલીના મજબૂત ડિફેન્સ અને ગોલકિપરના અસરકારક દેખાવને કારણે ગોલ ફટકારી શક્યા નહતા. આખરે ચિલીએ ફાઇનલમાં પ્રવેશ મેળવતા ઇતિહાસ રચી દીધો હતો. નોંધપાત્ર છે કે, અગાઉ ચિલીએ ઉરુગ્વે જેવી ધરખમ ટીમને હરાવીને આગેકૂચ કરી હતી.