ફેડરર, નડાલ અને ક્વિટોવાનો વિમ્બલ્ડનમાં વિજયી પ્રારંભ

સોંગાએ પાંચ સેટના મેરેથોન મુકાબલામાં મુલરને હરાવ્યો

કાર્લોવિચ, કેર્બેર, સેપ્પીની આગેકૂચ

સ્વિત્ઝર્લેન્ડના લેજન્ડરી ટેનિસ સ્ટાર ફેડરરે આઠમી વખત વિમ્બલ્ડન ટાઇટલ જીતવાના ઇરાદા સાથે વિજયી શરુઆત કરતાં ૬-૧,૬-૩, ૬-૩થી બોસ્નીયાના ડામિર ઝુમ્હુરને હરાવ્યો હતો. આ સાથે ફેડરરે તેની ફેવરિટ ગ્રાસ કોર્ટ ગ્રાન્ડ સ્લેમ ચેમ્પિયનશીપના બીજા રાઉન્ડમાં પ્રવેશ મેળવ્યો હતો. ફેડરરની સાથે સ્પેનિશ ટેનિસ સ્ટાર નડાલ તેમજ ચેક રિપબ્લિકની વિમેન્સ સિંગલ્સની ડિફેન્ડિંગ ચેમ્પિયન ક્વિટોવાએ પણ બીજા રાઉન્ડમાં સ્થાન મેળવ્યું હતુ.
લંડનની ઓલ ઈંગ્લેન્ડ કલબ ખાતે રમાઇ રહેલી સિઝનની ત્રીજી ગ્રાન્ડ સ્લેમ ચેમ્પિયનશીપમાં આજે બીજા દિવસે ફેડરર મેદાન પર ઉતર્યો હતો. તેણે માત્ર એક કલાક અને સાત મિનિટના મુકાબલામાં જીત મેળવી હતી. બે વખત અહીં ચેમ્પિયન રહી ચૂકેલા નડાલે બ્રાઝિલના થોમઝ બેલૂચીને ૬-૪,૬-૨, ૬-૪થી હરાવ્યો હતો. નડાલની બે કલાક અને ૧૦ મિનિટની રમતમાં ભારે આત્મવિશ્વાસ જોવા મળ્યો હતો.
ફ્રાન્સના યુવા સ્ટાર સોંગાને લક્ઝમ્બરના મુલરની સામે જીતવા માટે ૭-૬(૧૦-૮), ૬-૭(૩-૭) ,૬-૪, ૩-૬, ૬-૨થી સંઘર્ષ ખેલવો પડયો હતો. આ મુકાબલો ત્રણ કલાક અને ૫૧ મિનિટે એટલે આશરે ચાર કલાક ચાલ્યો હતો. બીજો સીડ ધરાવતી ચેક રિપબ્લિકની મહિલા ખેલાડી ક્વિટોવાએ નેધરલેન્ડની બેર્ટેન્સ સામેની મેચ ૬-૧,૬-૦થી આસાનીથી જીતી લીધી હતી. યુક્રેનના ડોલ્ગોપોલોવે બ્રિટનના એડમંડની સામે ૭-૬, ૬-૧થી જીત મેળવી હતી. ક્રોએશિયાના કાર્લોવિચે સ્વિડનના યમેરની સામે  ૬-૭,૬-૨, ૬-૪, ૭-૬ના સંઘર્ષ બાદ જીત મેળવી હતી.
જર્મનીની ૧૦મો સીડ ધરાવતી એંજેલિકે કેર્બેરે તેના જ દેશની વિટ્ટહોફ્ટના પડકારનો પહેલા જ રાઉન્ડમાં ૬-૦, ૬-૦થી અંત આણ્યો હતો. જ્યારે ઇટાલીના એન્ડ્રે સેપ્પીએ બ્રિટનના ક્લેઇન સામે ૬-૩, ૬-૨, ૬-૨થી વિજય પ્રાપ્ત કર્યો હતો. ભારતના રોહન બોપન્ના અને રોમાનિયાના ફ્લોરીન મેર્જેયાએ અમેરિકાના માયસ્ઝેક અને વેેસેલીની જોડીને ૬-૩, ૭-૬ (૭-૧), ૬-૧થી હરાવીને આગેકૂચ કરી હતી.