બ્રેડમેનને રમતા જોયા નથી, પણ સંગાકારાએ પ્રેરણા આપી

શ્રીલંકન કેપ્ટન મેથ્યૂસે સંગાકારાના વખાણ કર્યા

ભારત સામેની શરુઆતની બે ટેસ્ટ રમીને નિવૃત્તિ લેવા જઇ રહેલા શ્રીલંકાના લેજન્ડરી બેટ્સમેન સંગાકારાના વર્તમાન ટેસ્ટ કેપ્ટન મેથ્યૂસે ભારોભાર વખાણ કરતાં તેની તુલના ક્રિકેટ ઇતિહાસના મહાનતમ બેટ્સમેન સર ડોન બ્રેડમેન સાથે કરી હતી. મેથ્યૂસે કહ્યું હતુ કે, સર ડોન બ્રેડમેનને મેં બેટીંગ કરતાં જોયા નથી, પણ સંગાકારાની રમતે મને સતત પ્રેરણા આપી છે. તેના જેવો સાતત્યભર્યો દેખાવ કરનારો કોઇ બેટ્સમેન મેં મારી કારકિર્દી દરમિયાન જોયો નથી.
શ્રીલંકાના ટેસ્ટ કેપ્ટન મેથ્યૂસે કહ્યું કે, છેલ્લા ૧૫ વર્ષથી સંગાકારાએ જે પ્રકારે આંતરરાષ્ટ્રીય ક્રિકેટમાં પર્ફોમન્સ આપતાં શ્રીલંકાને ગૌરવ અપાવ્યું છે, તે માટે અમે તેનો આભાર માનીએ તેટલો ઓછો છે. મેં જોયેલા સાતત્યભર્યા બેટ્સમેનોમાં તે સૌથી મોખરે છે. મને તેની પાસેથી ઘણું બધુ શીખવા મળ્યું છે. તે હંમેશા મારા જેવા યુવા ક્રિકેટરોને સલાહ-સૂચન આપવા તેમજ મદદ કરવા માટે તૈયાર જ રહેતો હોય છે. તેની હાજરીથી અમને બધાને ખુબ જ પ્રેરણા મળી છે.
મેથ્યૂસે કહ્યું કે, અમે બધા ભારત સામેની શ્રેણીમાં યાદગાર દેખાવ કરીને સંગાકારાને વિદાય વેળાએ વિજયની ભેટ આપવા માટે ઉત્સક છું. અમારી ટીમની આજે આંતરરાષ્ટ્રીય ક્રિકેટમાં જે કોઇ શાખ છે તેના પાયામાં સંગાકારા, જયવર્દને, સમરવીરા અને દિલશાન જેવા ખેલાડીઓનું પર્ફોમેન્સ રહેલું છે. હવે અમારે શ્રીલંકન ક્રિકેટની ગરીમા જાળવવાની છે અને તેને આગળ ધપાવવાની છે.