સાંગડો- દક્ષિણ કોરિયાનું શહેર છે, જગતનું પ્રથમ સ્માર્ટ સિટી

 2015માં સાંગડો ખુલ્લું મૂકાયું છે

- દરિયાઈ ખાડી બૂરીને તૈયાર કરેલી જમીન પર શહે ઊભું છે

ભારતમાં સ્માર્ટ શહેર બનાવવા માટે સરકાર કટિબદ્ધ બની છે. જોકે જગતનું પ્રથમ સ્માર્ટ શહેર દક્ષિણ કોરિયાનું સાંગડો શહેર ગણાય છે. 2015માં જ સાંગડો કમ્પ્લિટ થઈને ખુલ્લું મુકાયું છે. દરિયાકાંઠે માટીનું પૂરાણ કરીને તૈયાર કરેલી જમીન પર શહેર ઉભું કરવામા આવ્યું છે.

600 હેક્ટરમાં ફેલાયેલું આ શહેર સાંગડો ઈન્ટરનેશનલ બિઝનેસ ડિસ્ટ્રીક તરીકે ઓળખાય છે. આ શહેર માટે દક્ષિણ કોરિયાએ 10 વર્ષમાં વિકાસ કરવા 40 અબજ ડોલર ફાળવ્યા હતાં. એ દુનિયાનો સૌથી મોટો ડેવલપમેન્ટ પ્રોજેક્ટ હતો.

શહેરમાં ટ્રાન્સપોર્ટ સુવિધા હેઠળ દરેક રસ્તા પર બાઈસિકલ પાથ અને ચાલવા માટેની અલગ જગ્યા રાખવામાં આવી છે. એ સિવાય મેટ્રો, બસો સહિતની સગવડ છે. શહેરમાં ઊર્જાનો વપરાશ, પ્રદૂષણ, વીજળી વગેરેના નિયંત્રણ માટે આધુનિક સિસ્ટમ દાખલ કરવામાં આવી છે.

પર્યાવરણ સંરક્ષણ માટે આ શહેરમાં ઠેર ઠેર ઈલેક્ટ્રીક કારના ચાર્જિંગ પોઈન્ટ રાખવામાં આવ્યા છે. જેથી લોકો ઈલેક્ટ્રિક કાર લઈને નીકળે તો તેમને ચાર્જિંગનો પ્રશ્ન નહીં રહે. રસોડામાંથી જ સીધો ઘરનો કચરો બહાર નીકળી શકે એવી ઓટોમેટિક સગવડ છે. જેથી કચરો વિણવાની કોઈ ગાડી આવતી નથી. કચરો સીધો જ અન્ડરગ્રાઉન્ડ સ્ટોરેજમાં જઈને ત્યાંથી નિકાલ પામે છે.

નોર્થ એશિયા ટ્રેડ ટાવર નામનું 65 માળ ઊંચુ બિલ્ડિંગ અહીં છે, જે દક્ષિણ કોરિયાનું સૌથી ઊંચુ બાંધકામ છે. ન્યુયોર્કના સેન્ટ્રલ પાર્કને ધ્યાનમાં રાખીને સાંગડોમાં પણ સેન્ટ્રલ પાર્ક એરિયા તૈયાર કરવામાં આવ્યો છે. શહેરની તમામ રચનામાં પર્યાવરણનું ધ્યાન રાખવામાં આવ્યુ છે. પરિણામે શહેર ઓછામાં ઓછુ કાર્બન પ્રદૂષણ કરશે.